Autoritetet e Maqedonisë së Veriut kanë arrestuar, të mërkurën, ish-ushtarin e Ushtrisë Çlirimtare të Kosovës (UÇK), ish-anëtar i Zonës Operative të Nerodimes, pasi që i njëjti kishte fletarrest nga Serbia.
Lajmi është bërë i ditur nga Ministria e Punëve të Jashtme dhe Diasporës, përmes një komunikate për media
“Ambasadori ynë në Maqedoninë e Veriut, Florian Qehaja, është angazhuar intensivisht për të trajtuar këtë rast dhe si MPJD Jemi duke punuar me autoritetet maqedonase për të siguruar lirimin e shpejtë të Ramadani”, thuhet në njoftim.
Nga MPJ-ja kanë theksuar se do të informojnë publikun për zhvillimet e mëtjshme lidhur me këtë rast.
Për arrestimin e Ramadanit, për Albanian Post ka folur zëvendëskryeministri i parë i Maqedonisë së Veriut, Izet Mexhiti.
Ai ka thënë se janë duke punuar për lirimin e tij, derisa ka theksuar se ka pasur edhe raste të tjera në të kaluarën.
“Po punojmë për ta evituar si problem”, tha Mexhiti për AP.
Zëvendëskryeministri shqiptar në qeverinë e RMV-së potencoi se jo vetëm për këtë rast, por “jemi duke punuar edhe për raste të tjera”.
Kjo ka ndodhur, siç tregoi Mexhiti, pasi që Serbia, ish-ushtarët e UÇK-së, i paraqet në INTERPOL.
“Pastaj paraqiten në sistem. Duhet që ta gjemë zgjidhjen që të eliminohet si fenomen, jo vetëm për këtë rast”, pohon.
Arrestimi i Ramadanit u krye në pikëkalimin kufitar Jaznicë-Glloboqicë, që lidh Kosovën me Maqedoninë e Veriut.
Ai është ish-anëtar i Zonës Operative të Nerodimes të UÇK-së.
The post Arrestohet ish-ushtari i UÇK-së në Maqedoninë e Veriut, kishte fletarrest nga Serbia appeared first on Albanian Post.
