Inkursioni i Ukrainës në rajonin e Kurskut të Rusisë është legjitim dhe mbulohet nga e drejta e Kievit për vetëmbrojtje, tha Sekretari i Përgjithshëm i NATO-s, Jens Stoltenberg, për të përjavshmen gjermane Welt am Sonntag, në reagimin e tij të parë ndaj avancimit në territorin rus.
“Ukraina ka të drejtë të mbrohet. Dhe sipas ligjit ndërkombëtar, kjo e drejtë nuk ndalet në kufi”, tha Stoltenberg për gazetën, duke shtuar se NATO nuk ishte informuar më parë për planet e Ukrainës dhe nuk luajti ndonjë rol në to.
Shefi i NATO-s tha se Ukraina po rrezikonte me avancimin në territorin rus, por se i takon Kievit se si ta zhvillonte fushatën e saj ushtarake.
“Presidenti (Ukrainas) (Volodymyr) Zelensky e ka bërë të qartë se operacioni synon të krijojë një zonë tampon për të parandaluar sulmet e mëtejshme ruse nga përtej kufirit,” tha ai.
“Si të gjitha operacionet ushtarake, kjo vjen me rreziqe. Por është vendimi i Ukrainës se si të mbrohet”.
Kievi filloi një inkursion të madh ndërkufitar në rajonin e Kurskut më 6 gusht, ndërsa trupat e Moskës vazhdojnë të bëjnë presion drejt qendrës strategjike të Pokrovsk në Ukrainën lindore.
Inkursioni u diskutua gjithashtu në një takim të Këshillit NATO-Ukrainë të mërkurën që u kërkua nga Kievi në mes të valës më të madhe të sulmeve ajrore të Moskës ndaj fqinjit të saj.
Këshilli, që grupon anëtarët e aleancës ushtarake perëndimore dhe Ukrainës, u krijua vitin e kaluar për të mundësuar një koordinim më të ngushtë midis aleancës dhe Kievit.
The post Inkursioni i Ukrainës në rajonin e Kurskut të Rusisë është legjitim, thotë Stoltenberg appeared first on Albanian Post.
