Trajneri gjerman, Julian Nagelsmann, ka dënuar si “racist” një sondazh të fundit që pyeti pjesëmarrësit nëse dëshironin të shihnin më shumë lojtarë të bardhë në ekipin kombëtar të futbollit.
Sondazhi i transmetuesit publik ARD tha se 21% e të anketuarve ishin dakord me propozimin.
“Është raciste. Ndjej se duhet të zgjohemi. Shumë njerëz në Evropë u detyruan të iknin, duke kërkuar për një vend të sigurt”, tha Nagelsmann të dielën.
36-vjeçari tha se ishte dakord me mesfushorin gjerman Joshua Kimmich, i cili e përshkroi pyetësorin si “racist” një ditë më parë.
“Josh [Kimmich] u përgjigj shumë mirë, me një deklaratë shumë të qartë dhe të menduar,” tha Nagelsmann në një konferencë në bazën stërvitore të ekipit të tij.
“Unë e shoh këtë në të njëjtën mënyrë. Kjo pyetje është e çmendur”.
“Ka njerëz në Evropë që u është dashur të ikin për shkak të luftës, faktorëve ekonomikë, fatkeqësive mjedisore, njerëz që thjesht duan të pranohen”, vazhdoi ai.
“Ne duhet të pyesim se çfarë po bëjmë në këtë moment? Ne në Gjermani po bëjmë shumë, shumë mirë, dhe kur themi diçka të tillë, mendoj se është çmenduri se si mbyllim një sy dhe thjesht i bllokojmë gjëra të tilla”.
ARD – transmetuesi publik gjerman – tha se kishte porositur sondazhin që të kishte të dhëna të matshme, pasi një reporter që punonte në një dokumentar mbi futbollin dhe diversitetin u pyet vazhdimisht për përbërjen e ekipit kombëtar.
Sondazhi u krye mes 1 mijë e 304 të anketuarve të përzgjedhur rastësisht.
Karl Valks, drejtor sportiv i stacionit ARD i cili autorizoi sondazhin, tha se kompania ishte “e tronditur që rezultatet janë ato që janë, por ato janë gjithashtu një shprehje e situatës sociale në Gjermani sot”.
“Sporti luan një rol të rëndësishëm në shoqërinë tonë, kombëtarja është një shembull i fortë i integrimit”, cituan mediat gjermane të ketë thënë ai.
Skuadra aktuale kombëtare ka një numër lojtarësh me trashëgimi të përzier, duke përfshirë kapitenin Ilkay Gündogan dhe anësorin Leroy Sané.
Gjermania po pret turneun Euro 2024 më vonë këtë muaj dhe Nagelsmann tha se ekipi i tij do të luante “për të gjithë në vend”. Ata do ta nisin garën me një përballje kundër Skocisë në Allianz Arena të Mynihut më 14 qershor.
Polemika vjen vetëm disa javë pasi prodhuesi i kompleteve të ekipit, Adidas, u detyrua të ndalonte tifozët të blinin fanella gjermane të futbollit të personalizuara me numrin 44, pasi mediat ngritën ngjashmërinë e tyre me simbolin e përdorur nga njësitë naziste SS të epokës së Luftës së Dytë Botërore.
SS ishte përgjegjës për shumë nga krimet kundër njerëzimit të kryera nga nazistët. Anëtarët e SS varionin nga agjentët e Gestapos deri te rojet e kampeve të përqendrimit. Detyrat e SS përfshinin administrimin e kampeve të vdekjes ku miliona hebrenj dhe të tjerë u vranë.
The post Trajneri i kombëtares gjermane dënon sondazhin televiziv ‘racist’ appeared first on Albanian Post.
