Ministri i Punëve të Jashtme të Serbisë, Ivica Daçiç, përmes një letre ia ka bërë të qartë të gjithë punonjësve në misionet diplomatike dhe konsullore të Serbisë se “nuk është e mundur të shfrytëzohen pushimet në periudhën e ardhshme”, pasi më 17 prill, Kosova kaloi me sukses edhe fazën e dytë në procesin e anëtarësimit në Këshillin e Evropës, derisa tani i ka mbetur vetëm edhe një hap.
“Sfidat e shumta dhe shumë të vështira të politikës së jashtme me të cilat po ballafaqohet Serbia aktualisht, prandaj pritet angazhim maksimal i të gjithë punonjësve në Ministri dhe të gjithë rrjetit diplomatik-konsullor për çështjet e rezolutës për Srebrenicën dhe kërkesës së Kosovës për pranim në Këshillin Evropës”, thuhet në letër, raporton rrjeti ballkanik i lajmeve N1.
“Për këtë arsye, ju tregoj se përdorimi i pushimit në periudhën në vijim nuk do të jetë i mundur. Meqenëse festat e ardhshme janë në periudhën kur është i nevojshëm veprimi ynë më aktiv, ju duhet të qëndroni në vendet pritëse dhe të vazhdoni të mbroni me përkushtim interesat tona”, thuhet në letrën e kryediplomatit serb.
Ky “mobilizim” i diplomacisë serbe vije pasi Kosova kaloi me sukses edhe fazën e dytë në procesin e anëtarësimit në Këshillin e Evropës, derisa tani i ka mbetur vetëm edhe një hap.
Kjo u vendos në Asamblenë Parlamentare të KiE-së, të cilët me shumicë dërrmuese vendosën pro miratimit të raportit të raportueses për Kosovën në këtë organizatë, Dora Bakoyannis.
Për miratimin e raportit të raportueses për Kosovën në KiE, Dora Bakoyannis, kanë qenë 131 vota PRO, 29 kundër dhe 11 abstenime.
Por, para miratimit, Asambleja Parlamentare e KiE-së, i hodhi poshtë të gjitha amendamentet e propozuara nga Serbia.
Për t’u bërë anëtare e plotë e KiE-së, Kosovës tanimë i ka mbetur vetëm edhe një hap: votimi i Këshillit të Ministrave të Jashtëm në muajin maj.
The post Debakli i Serbisë në Këshillin e Evropës – Daçiç, diplomatëve serbë: S’ka pushim, dua angazhim maksimal appeared first on Albanian Post.
