Kryetari i Aleancës për Ardhmërinë e Kosovës, Ramush Haradinaj, ka njoftuar të martën se partia e tij ka formuar shtabin zgjedhor për Zgjedhjet Parlamentare.
Me votë unanime, sipas Haradinajt, në krye të këtij shtabi është zgjedhur sekretari i përgjithshëm i kësaj partie, Muharrem Nitaj.
“Në këtë mbledhje poashtu është diskutuar plani i aktiviteteve të Aleancës në terren, përfshirë edhe orientimet kryesore programore për fazën vijuese”.
Një pikë e veçantë e mbledhjes së kryesisë së AAK-së, sipas ish-kryeministrit të Kosovës, ka qenë edhe informimi për situatën politike e të sigurisë në vend.
“Kjo në dritën e zhvillimeve të fundit, përfshirë edhe procesin e votimit të Kosovës në Këshillin e Evropës”.
Ndryshe të martën edhe kryesia e Lidhjes Demokratike të Kosovës ka mbajtur mbledhjen e saj të tretë.
Sipas një komunikate për media, LDK, është duke vazhduar mobilizimin e të gjitha strukturave dhe anëtarësisë së saj në vend dhe diasporë.
“Takimet dhe aktivitetet tona po vazhdojnë degë më degë e lagje më lagje duke takuar dhe diskutuar me secilin qytetar rreth programit tonë politik ‘Rruga e Re’ i cili ofron zgjidhje për hallet e përditshme të tyre”, thuhet në komunikatë.
LDK, siç theksohet në komunikatë, ka shprehur keqardhje që Qeveria e Kosovës me “mospunën e saj ka degraduar marrëdhëniet e vendit tonë me partnerët tanë ndërkombëtar”.
“Fatkeqësisht, raportet e institucioneve prestigjioze si Departamenti i Shtetit Amerikan, Freedom House dhe të tjerë konstatojnë korrupsionin e lartë të kësaj Qeverie, ndërhyrjet në institucionet e gjyqësorit, sulmet ndaj medieve dhe gazetarëve dhe një varg shkeljesh e dështimesh të cilat LDK i ka ngritur me kohë në Kuvendin e Kosovës duke i kërkuar Qeverisë së Kosovës të ndalë popullizmin dhe të kultivojë e avancojë marrëdhëniet ndërkombëtare të ndërtuara me shumë zell ndër vite”, thuhet në komunikatë.
LDK, njofton tutje komunikata, ka përcjellë me shqetësim investimin institucional të Republikës së Kosovës në përçarjen e shqiptarëve në rajon.
“LDK riafirmon qëndrimin e saj për bashkëpunim me të gjitha partitë politike shqiptare duke besuar në kapacitetet e tyre dhe duke mos ndërhyrë në çështjet e tyre politike apo ndërpartiake”.
The post AAK-ja formon shtab zgjedhor appeared first on Albanian Post.
