Gjeneralët e lartë të ushtrisë izraelite janë të interesuar për një “armëpushim në Gaza, edhe nëse ai mban Hamasin në pushtet për momentin”, sipas “New York Times”.
Raporti citon gjashtë zyrtarë të tanishëm dhe të mëparshëm të sigurisë, të cilët besojnë se një armëpushim do të ishte i dobishëm për disa objektiva izraelite.
Kjo për lirimin e pengjeve izraelitë të mbajtur ende rob në Gaza, arritjen e një marrëveshjeje me Hezbollahun për të parandaluar një luftë në kufirin e Izraelit me Libanin, dhe duke u dhënë kohë forcave për t’u rikuperuar në rast se do të shpërthejë një luftë me Hezbollahun.
Kryeministri izraelit, Benjamin Netanyahu, iu përgjigj raportit duke thënë se Izraeli “do t’i japë fund luftës vetëm pasi të kemi arritur të gjitha qëllimet e tij.”
Sipas raportit, qëndrimi i ushtrisë “pasqyron një ndryshim të madh në të menduarit e saj gjatë muajve të fundit pasi u bë më e qartë se kryeministri Benjamin Netanyahu po refuzonte të artikulonte ose të angazhohej për një plan të pasluftës”.
Raporti citon ish-këshilltarin izraelit për sigurinë kombëtare, Eyal Hulata, i cili thotë se “ushtria është në mbështetje të plotë të një marrëveshjeje pengjesh dhe armëpushimi”, duke shtuar se “ata e kuptojnë se një pauzë në Gaza e bën më të mundshëm de-përshkallëzimin në Liban”.
“Dhe ata kanë më pak municione, më pak pjesë këmbimi, më pak energji se sa kanë pasur më parë – kështu që gjithashtu mendojnë se një pauzë në Gaza na jep më shumë kohë për t’u përgatitur në rast se do të shpërthejë një luftë më e madhe me Hezbollahun”.
“New York Times” thotë se është “e paqartë se sa drejtpërdrejt udhëheqja ushtarake i ka shprehur pikëpamjet e saj” kryeministrit.
Në përgjigje të raportit, IDF lëshoi një deklaratë: Ushtria po ndjek shkatërrimin e aftësive ushtarake dhe qeverisëse të Hamasit, kthimin e pengjeve dhe kthimin e civilëve izraelitë nga jugu dhe veriu i sigurt në shtëpitë e tyre.
Kryeministri Netanyahu reagoi ndaj artikullit, duke thënë se “burime anonime” i thanë “New York Times” se “Izraeli është gati t’i japë fund luftës përpara se të arrijë të gjitha qëllimet”.
“Unë nuk e di se cilët janë ato burime të paidentifikuara, por kjo nuk do të ndodhë – vetëm pasi të kemi arritur të gjitha qëllimet e saj, duke përfshirë eliminimin e Hamasit dhe lirimin e të gjithë pengjeve tona”.
“Qeveria i përcaktoi këto synime për IDF-në dhe IDF i ka të gjitha mjetet për t’i arritur ato. Ne nuk i nënshtrohemi frymës së disfatizmit, as në New York Times dhe as askund tjetër. Ne jemi të mbushur me frymën e fitores”, tha Netanyahu.
The post NYT: Udhëheqësit e ushtrisë izraelite duan armëpushim në Gaza, edhe me Hamasin në pushtet appeared first on Albanian Post.
